Sum liður í einum skifti við Russland hevur Ukraina fingið líkini av 909 ukrainskum hermonnum.
Hetta upplýsa ukrainskir myndugleikar, sambært tíðindastovuni AFP.
- Sum úrslit av leyslatingaravtalum vórðu líkini av 909 falnum ukrainskum hermonnum latin aftur til Ukraina, skriva myndugleikarnir í ukrainska høvuðsstaðnum, Kiev.
Skiftið av krígsfangum og líkum er eitt av fáu økjunum, har Ukraina og Russland hava samstarvað síðani Russland herjaði á Ukraina í februar 2022.
Hetta er aðru ferð innan tríggjar vikur, at slíkt skifti er farið fram.
Russland plagar ikki at geva upplýsingar um móttøku av deyðum hermonnum og hevur heldur ikki gjørt tað hesaferð. Men russiskir miðlar skriva, at líkini av 41 russiskum hermonnum eru latin aftur.
Hetta umbýtið verður gjørt samstundis sum samráðingarnar um vápnahvíld undir amerikanskari leiðslu tykjast at vera steðgaðar.
Um miðjan februar segði ukrainski forsetin, Volodymyr Zelensky, at fleiri enn 46.000 ukrainskir hermenn vóru dripnir í krígnum og umleið 380.000 vóru særdir.
Metta talið er tó mett at vera hægri.
Russland hevur ikki upplýst, hvussu nógvir russiskir hermenn hava latið lív í krígnum.
Óhefta tíðindastovan Mediazona og bretska BBC hava, við at greina dátur frá alment tøkum keldum, mett, at í minsta lagi 100.000 russiskir hermenn eru deyðir síðani kríggið byrjaði.
/Ritzau/
