Ukrainski uttanríkisráðharrin, Dmytro Kuleba, sigur sambært tíðindastovuni AFP, at russiski forsetin, Vladimir Putin, er desperatur.
Orsøkin er, sigur hann, at tað hevur gingið so illa hjá russum á hermótunum í Ukraina, har russiskar herdeildir eru riknar aftur í fleiri økjum.
Í minsta lagi 10 fólk eru dripin og 60 løstað, tá Russland framdi hevndarálop móti fleiri ukrainskum býum í morgun.
Alt bendir á, at atsóknirnar í morgun eru hevnd fyri, at Krim-brúgvin, sum knýtir Krim-hálvoynna beinleiðis til Russland, var fyri álopi um vikuskiftið.
Sambært ukrainskum myndugleikum raktu 75 russiskar rakettir í morgun býir í Ukraina.
Ukrainski forsetin, Volodymyr Zelenskyj, sigur, at rakettirnar vórðu vendar móti orkuveitingini og undirstøðukervinum í Ukraina.
Forsetin sigur, at Russland skeyt tilsamans 75 rakettir eftir býum í landinum, harav ukrainska loftverjan skeyt 41 av rakettunum niður.
Russiska álopið kemur eitt samdøgur eftir, at russiski forsetin, Vladimir Putin, gav Ukraina skyldina fyri álopið á Krim-brúnna leygardagin.
Í einari sjónvarpsrøðu í samband við fund í russiska trygdarráðnum í dag kom russiski forsetin við hørðum ákærum móti Ukraina.
- Um álopini á Russland halda fram, fara vit at svara harðliga aftur, segði Vladimir Putin í røðu síni.
