Ein avtala, sum endaliga fer at leysgeva stóru korngoymslurnar hjá Ukraina, tykist nú at vera upp á pláss. Samstundis tykist Russland at missa ondina, heldur bretskur fregnartænastumaður.
Her er eitt yvirlit yvir gongdina í krígnum:
* Russland og Ukraina skriva undir eina kornavtalu í dag
Russland og Ukraina fara í dag at skriva undir eina avtalu, sum gloppar dyrnar fyri, at korn aftur kann útflytast úr ukrainskum havnum við Svartahavið.
Tað upplýsir turkiska forsetaskrivstovan sambært tíðindastovuni Reuters.
Turkiski forsetin, Recep Erdogan, hevur saman við ST virkað sum semingsmaður millum Russland og Ukraina. Avtalan hevur verið ávegis í tveir mánaðir, og í síðstu viku varð samráðst í Turkalandi.
* Bretskur fregnartænastustjóri: Russland er við at missa ondina.
Russiski herurin fer sannlíkt at halda ein operativan steðg í Ukraina komandi vikurnar.
Tað heldur Richard Moore, sum er stjóri í bretsku fregnartænastuni MI6, sambært Reuters.
– Eg haldi, at tey eru við at missa ondina, segði hann á Aspen Security Forum, sum er í Colorado í USA.
* Ukraina: Russland hevur brúkt umleið 55-60 prosent av teimum missilum, sum landið hevur á goymslu, innan innrásina.
Tað upplýsti ukrainska fregnartænastan sambært amerikanska tankasmiðjuni ISW í nátt.
* Zelenskyj: Ukraina kann rættiliga pína Russland.
Ukrainski herurin kann gera framstig á vígvøllinum og gera Russlandi stóran skaða, segði ukrainski forsetin, Volodymyr Zelenskyj, í gjár eftir at hava hitt høgar yvirmenn. Tað skrivar Reuters.
/ritzau/
