Í minsta lagi sjey fólk hava latið lív eftir eitt russiskt loftálop á ein íbúðarblokk í ukrainska býnum Kharkiv í dag.
Tað sigur frágreiðingin frá økisguvernørinum í Kharkiv, Oleh Synyehubov, sambært týsku tíðindastovuni dpa.
Sambært guvernørinum vóru tvey børn millum tey, sum doyðu í álopinum.
Talið av deyðum vaks tíðliga í morgun, tá bjargingarfólk funnu lík í leivdunum eftir álopið á bygningin, stendur í fráboðanini.
Russland hevur ikki gjørt viðmerkingar til ukrainsku fráboðanina um eitt deyðiligt álop.
Oleh Synyehubov skrivaði áður á boðtænastuni Telegram, at tíggju fólk fingu skaða í álopinum. Teirra millum vóru tveir dreingir í aldrinum 6 og 11 ár, umframt ein 17 ára gomul genta.
Bygningurin í fimm hæddum er so at siga oyðilagdur, skrivar Oleh Synyehubov.
Ukrainski forsetin, Volodymyr Zelenskyj, skrivar í einum uppslagi á X, at tað framvegis kunnu vera fólk fangað undir leivdunum, og at bjargingararbeiðið framvegis er í gongd.
Sambært forsetanum vóru fleiri av álopinum í gjárkvøldið eisini móti kritiskum undirstøðukervi í landinum.
– Russland hevur ikki givið upp royndina at oyðileggja bústaðar- og kritiska undirstøðukervið í Ukraina, og tí skal stuðulin (til Ukraina, red.) halda fram, skrivar Zelenskyj í uppslagnum.
Eisini varð boðað frá einum dronuálop í nærliggjandi býnum Chuhujiv, sum liggur í Kharkiv-landslutinum.
Halyna Minajeva, borgarstjóri, sigur sambært AFP, at tvey fólk fingu skaða eftir eitt fíggindaligt dronuálop á eitt hús.
Ávaringar um loftálop vóru um alt Ukraina í morgun, skrivar AFP.
Pólland hevur sent jagaraflogfør á flog sum avleiðing av russisku álopunum á grannalandið. Tað boðaði operativa leiðslan hjá pólska herinum frá leygardagin á sosiala miðlinum X.
/Ritzau/
