Noreg megnaði einki at gera við eitt vælspælandi spanskt U21 landsliðið, sum vann 3-0 í aðrari hálvfinaluni. Í hinari hálvfinaluni vann Italia 1-0 á Hollandi.
Norska U21-landsliðið fekk eina ordans lektión í tiki-taka fótbólti, tá Spania og Noreg møttust í hálvfinaluni um vikuskiftið. Spanska landsliðið er í einum flokki fyri seg og spælið er flótandi, skjótt, teknist og neyvt.
Norsku U21-landsliðsspælararnir kunnu verða ernir av at verða komnir í hálvfinaluna, men móti Spania var einki at gera. Tað var bara takka verið einum stórspælandi Orjan Nyland Haskjold í norska málinum, at Spania ikki vann ein størri sigur.
Í 45 minuttir megnaði hann at halda málið reint, hóast álopini skolaðu móti norska málinum. Tá so málið kom, so var tað eitt sindur tilvildarligt. Bólturin verður ikki ruddaður vekk eftir innlegg og so fær Rodrigo sett fótin á bóltin, sum endar í málinum.
Stutt fyri dystarenda vísti Isco hví so nógv feløg í Evropa vilja hava miðvallaran hjá Malaga. Fyrst sneiddi hann framvið tveimum norskum verjuspælarum, áðrenn hann hegnisliga sendi bóltin upp í málhornið til 2-0. Stutt seinni økti Álvari Morata til endaliga úrslitið 3-0.
Í hinari hálvfinaluni gjørdist Fabio Borini dagsins hetja fyri Italia, tá hann tíggju minuttir fyri tíð skoraði einsamalla málið í dystinum móti Hollandi, sum annars rakti trýkantin við frísparki.
Sostatt skulu Spania og Italia spæla í U21 EM finaluni, sum verður í morgin. Tað er ein endurtøka av finaluni í EM 2012 í Ukraina og Póllandi. Spanska liðið má mestast sum rímiliga greiður favorittur.
U21 EM 2013:
Spania Noreg 3-0 (1-0)
1-0 Rodrigo, 45+1
2-0 Isco, 87
3-0 Álvaro Morata 90+2
Italia Holland 1-0 (1-0)
1-0 Fabio Borini, 79
