So er tað staðfest, at føroyska U19-manslandsliðið vann millumbólk 4 í HM-endaspælinum í Kroatia.
Týskland vann 32-25 (13-9) á Iran. Føroyar og Týskland enda á fýra stigum hvør. Føroyar eru betri innanhýsis og taka tí fyrsta plássið. Iran sum vann á Føroyum endar aftast í bólkinum, tí teir taptu móti Saudiarabia, ið eisini hevur tvey stig í millumbólki 4. Iran vann annars á Føroyum í tí innleiðandi bólkinum.
Hetta merkir, at Føroyar møta nummar tvey í millumbólki 2, ið er Egyptaland. Egyptaland tapti bólkafinaluna í millumbólki 2 fyri Spania. Spania vann 42-35 (20-17), og vinnur harvið bólkin.
Føroyar spæla fjórðingsfinalu móti Egyptalandi hósdagin klokkan 12.
Fjórðingsfinalurnar vera allar leiktar hósdagin. Tær eru Føroyar-Egyptaland klokkan 12, Spania-Týskland klokkan 14.30, Danmark-Portugal klokkan 17 og Kroatia-Noreg klokkan 19.30.
Vinnarin av dystinum millum Føroyar og Egyptaland møtir vinnaranum av dystinum millum Spania og Týsklandi. Tann hálvfinalan verður leikt fríggjadagin klokkan 17.
