Føroyska U17 landsliðið hevur havt sína seinastu venjing undan helst møtumiklastu uppgávuni higartil, tá okkara ungu menn skulu spæla móti Fraklandi. Tað er longu greitt, at nakrar broytingar verða á liðnum.
Asbjørn Heðinsson úr 07 Vestur bleiv útvístur í 2-0 tapinum fyri Skotlandi. Tí hevur hann leikbann. Steffan A. Løkin úr NSÍ hevur trupulleikar við stórutá. Arbeitt veður við at fáa áleyparan kláran til dystin.
Bæði málverjin, Bárður á Reynatrøð úr Víkingi, og miðvallarin úr B36, Magnus Holm Jacobsen, eru við eftir at hava sitið fyrsta dystin yvir við leikbanni. Tórur Jacobsen úr KÍ sat eisini yvir í fyrsta dystinum við skaða, men tað verður vónað, at hann klárar at spæla í morgin.
Til landsliðsvenjingina í dag kundi sæð út til, at Bárður á Reynatrøð verður millum stengurnar, meðan Sølvi Sigvardsen úr NSÍ verður fluttur frá miðvøllinum og aftur á høgra bakk fyri Asbjørn Heðinsson. Nýggjur á miðjuni verður Magnus Holm Jacobsen.
Um Steffan A. Løkin ikki spælir, so tykist sannlíkt, at Símun Sólheim úr HB verður fluttur av vonginum og inn á framrættaða miðvøllin, so at Stefan Radosavljevic úr TB/FCS/Royn verður fluttur fram í álopið. Síðani kemur Tórur Jacobsen inn á vinstra vongin, meðan Hanus Sørensen er á hinum vonginum.
Vit gita: (4-2-3-1)
Bárður á Reynatrøð – Sølvi Sigvardsen, Dann Fróðason, Andrias Edmundsson, Sjúrður Pauli Nielsen – Magnus H. Jacobsen, Elias El Moustage – Hanus Sørensen, Símun Sólheim, Tórur Jacobsen – Stefan Radosavljevic
