Tíðliga í kvøld fór ein útróðrarbátur úr Skopun á land nakað sunnanvert Skopunarbygd. Ein maður var við bátinum.
Stutt eftir, at MRCC hevði fingið fráboðan um hendingina, vórðu tyrla og bjargingarbáturin Lív send á staðið.
Tað eydnaðist tyrluni at taka mannin upp úr bátinum, og hann er flogin til Skopunar, har hann býr, og haðani hann var farin til útróðrar.
Tyrlan lendi á tyrlupallinum á Skerinum, tey rópa í Skopun. Tað er á leiðini, har eldrasambýlið í bygdini er.
Sambært skiparanum á Tjaldrinum er maðurin nú í øllum góðum heima við hús aftur í Skopun.
Bjargingarbáturin Lív sleipar nú útróðrarbátin til Skopunar.
Skiparin á Tjaldrinum sigur, at sum løtan leið, loysnaði útróðrarbáturin úr landi, og tá hann var rikin nakað út um skerini á leiðini, setti Lív á hann at sleipa.
- Lív sleipar nú útróðrarbátin til Skopunar, eins og maðurin, sum var í bátinum, er heima aftur í øllum góðum, verður lagt aftrat.
Tað seinasta, sum In.fo hevur frætt, er, at útróðrarbáturin lekur, og at manningin á bjargingarbátinum Lív hevur sett pumpur umborð í bátin.
##med2##
