Eitt reytt kort tíðliga í seinna hálvleiki kostaði nógv hjá KÍ, sum var gestur hjá NSÍ, tá ið fyrsti dystur í næstbestu deildini var á middegi. Ætlanin var, at fyrsta bríkslið skuldj vera klokkan ellivu, m en tá var nógvur kavi á vøllinum. Ein lítlan tíma seinni var ruddað, og so bríkslaði Petur Reinert fyri fyrstu ferð.
KÍ var frammanfyri 1-0, tá ið Aksel B. Danielsen sá beinleiðis reytt kort. Hetta var tíðliga í seinna hálvleiki. Einasta málið í fyrra hálvleiki skoraði David Langgaard eftir flatt innlegg úr vinstru. Stutt eftir reyða kortið økti Jóhan Waag Høgnesen við beinleiðis horna úr vinstru til 2-0.
Sum tíðin leið, sást tað alt meiri, at tað vóru ellivu ímóti tíggju. Hans Marius Davidsen, liðformaðurin, sum var fluttur fram í álopið eftir útvísingina, minkaði um munin við fløtum skoti, og so gekk tað mesta fyri seg á KÍ hálvuni. Kristian Joensen í KÍ málinum bjargaði meistarliga onkra ferðina, men eftir innlegg var tað aftur Hans Marius Davidsen, sum var upp á spæl og javnaði til 2-2.
Mótbrekkan hjá klaksvíkingum varð uppaftur brattari, tá ið Tórur Justesen sá gula kortið fyri aðru ferð. Síðstu minuttirnar vóru ellivu heimamenn ímóti níggju bláum, men tað eydnaðist KÍ at halda tørn um javnleikin.
Skála og HB skulu spæla á middegi, men tann dysturin er útsettur.
Grannauppgerðin millum ÍF og Víking, sum sambært skránni skuldi vera í Fuglafirði, er í staðin í Sarpugerði.
