Kanningar hjá belgisku og fronsku løgregluni benda á, at teir, sum stóðu fyri álopunum í Belgia mánamorgunin vóru partur av somu yvirgangskjarnu, sum teir, ið stóðu fyri álopunum í París 13. novembur í fjør.
Høvuðspersónurin í kjarnuni var yvirgangsmaðurin Abelhamid Abaaoud, sum varð dripin av fronsku løgregluni nakrar dagar eftir álopini í París.
Nú óttast myndugleikarnir, at kjarnan enn ikki er oyðiløgd. Sambært franska blaðnum Le Monde verður mett, at minst tveir yvirgangsmenn afturat hoyra til somu kjarnu, men at teir ikki eru tiknir enn. Nøvnini á teimum báðum eru framvegis ikki almannakunngjørd, men løgreglan leitar miðvíst eftir teimum í og rundan um Bruxelles.
Annar teirra var við teimum báðum sjálvmorðsbumbumonnunum á flogvøllinum. Tað er maðurin í hvíta jakkanum og hatti, sum ein hevur sæð á myndum frá vakmyndatólunum á flogvøllinum. Bumba hansara brast eftir øllum at døma ov tíðliga og eingin varð særdur av henni.
Hin eftirlýsti gekk saman við Khalid El Bakraoui í metro’ini. Eins og El Bakraoui bar hann ein stóran svartan sekk á veg oman í metro’ina.
Sambært le Monde er eisini ein triði persónur, ið hoyrir til somu kjarnu, enn eftirlýstur. Mohamed Abrini fylgdist fyrr á degnum við teimum 10 yvirgangsmonnunum í París, men er síðani farin undir heilt.
Síðani yvirgangsálopini í París í novembur eru 14 mans handtiknir í Frankaríki og Belgia, tveir í Eysturríki og ein í Tunisia, allir við einum hvørjum tilknýti til Abdelhamid Abaaoud. 12 mans eru deyðir í yvirgangsatsóknunum. Kortini, Abdelhamid Abaaoud fortaldi einum systkinabarni, meðan hann flýddi undan løgregluni eftir álopið í París, at 90 yvirgangsmenn vóru klárar at sláa til í Evropa. So enn eru nakrir leysir.
