Fleiri brúgvaløg við regni fara komandi dagarnar framvið Føroyum úr vestri. Sunnudagin fer eitt lágtrýst væntandi at flyta seg yvir Føroyar úr suðri og víðari norður í Norðhavið, meðan køld luft norðan blæsir yvir oyggjarnar.
Týsdagin verður eitt andøvsgul upp í ein strúk av vindi av útsynningi, sum snarar í ein vestan og veksur upp í stívt andøvsgul til hvassan vind. Sum kvøldið líður makar hann vindin aftur. Turt og samdrigið, men fyrrapartin rættiliga skýggjað eina løtu. Um náttina gul til stívt andøvsgul av útsynningi og suðri, sum frá líður skýggjað, men yvirhøvur turt. Hitin alt samdøgrið millum fimm og átta stig.
Mikudagin verður eitt gul til stívt andøvsgul av suðri, sum veksur til andøvsgul upp í ein strúk av vindi, og snarar síðani í ein útsynning. Skýggjað og stundum regn og hitin millum fimm og átta stig. Um náttina makar hann vindin til gul til stívt andøvsgul av vestri og útsynningi. Tað klárar í og yvirhøvur turt og hitin millum tvey og fimm stig.
Hósdagin verður eitt gul til stívt andøvsgul av útsynningi og suðri, sum veksur til eitt andøvsgul upp í ein strúk av vindi. Skýggjað og í støðum regn og hitin millum fimm og átta stig.
Fríggjadagin verður eitt gul til stívt andøvsgul av suðri, í støðum upp í strúk av vindi. Turt og sum frá líður sær sólin eisini. Um kvøldið veksur hann vindin upp í ein strúk av vindi, og tað regnar úr vestri. Út á náttina snarar hann í ein útsynning og tað klárar í, tó við onkrum æli. Hitin millum fimm og átta stig.
Leygardagin verður eitt stívt andøvsgul upp í hvassan vind av útsynningi, men sum frá líður veksur hann vindin til strúk í vindi upp í skrið. Samdrigið og ælaveður. Hitin millum trý og sjey stig.
Sunnudagin makar hann vindin og verður eitt lítið lot av ymsum ættum, men seint á degi veksur hann vindin til stívt andøvsgul upp í hvassan vind av norði og útnyrðingi. Mest skýggjað og ælaveður, seinni regn, sum tó kann gerast vátaslettingur ella vátakavi. Hitin fellur til millum frostmarkið og trý hitastig.
