Hetta er størsta rokið um ein evropesiskan dyst í føroyskari fótbóltssøgu. Champions league dysturin millum KÍ og Slovan Bratislava bleiv útsettur tvær ferðir, tí korona bleiv staðfest í hópinum hjá gestunum úr Slovakia.
Eftir ætlan skal vinnarin av dystinum millum KÍ og Slovan Bratislava spæla í 2. umfari av Champions League undankappingini mikukvøldið. Dysturin verður móti Young Boys í Sveis. Upprunaliga skuldi KÍ fara avstað í dag, men nú er alt útsett til í morgin, tí klokkan er blivin ov nógv til at ferðast í dag.
- Hetta er ein stór frustratión fyri okkum. Vit hava sitið klárir at fara síðani klokkan 9, men nú er alt útsett til í morgin, sigur Tummas Lervig, formaður í KÍ.
Hann leggur afturat, at hópurin er avslappur og hevur tamarhald á støðuni, hóast tað valdar óvissa um KÍ skal spæla, og nær teir sleppa avstað um so verður. Formaðurin í KÍ hevur tó fingið at vita, at ein avgerð fyriliggur skjótt.
- Vit hava fingið upplýst gjøgnum føroyska Fótbóltssambandið, ið hevur verið í samband við UEFA, at eitt svar fyriliggur skjótt, leggur Tummas Lervig afturat.
##med2##
Upprunaliga skuldu KÍ og Slovan Bratislava spæla mikukvøldið, men tað bleiv útsett til fríggjadagin, tí korona var í hópinum hjá gestunum. Tá so eykaliðið kom vegin fram var aftur ein positiv test, og tað er eftirspælið av hesum, sum er í gongd nú.
##ms##
