Leygardagin skuldi tað rættiliga koma til skarpskeringar, tá yvirmannafakfeløgini høvdu lýst verkfall at vera, sum ítøkiliga fór at raka siglingina hjá Strandferðsluni.
Og tá hóvaði ikki Johan Dahl, sum beinanvegin boðaði frá, at hann fór í tingið við málinum, soleiðis at Strandferðslan slapp at sigla.
Málið um at friða strandfaraskipini fyri verkfallið hevur verið frammi í nógv ár. Men enn hevur politiski myndugleikin ikki megnað at koma í tingið við einum lógaruppskoti ella at gera avtalur við fakfeløgini, sum kunnu tryggja, at skipini kunnu sigla hóast verkfall.
At slíkt kostar er sjálvsagt. Tað sum ørkymlar er, at fakfeløgini eru so forfjónað og niðurbundin, at tey lata alt um seg ganga. Tey tora einki og megna einki ímóti Jørgen Niclasen og hansara 19 fólkum í samgonguni. Flatskatturin og pensjónsforskattingin eru dømi um hetta. At tey ikki langaðu nevan í longu fríggjadagin er annað dømi.
