Tað er púra víðopið millum Pólland, Noreg, Kroatia og Frakland um hvør av teimum vinnur seg í EM-hálvfinaluna í manshondbólti. Samstundis er greitt, at Makedonia og Hvítarussland eru uttan møguleika at vinna seg víðari í kappingini, tí tey standa framvegis við ongum stigi.
Frakland kom aftur á slóðina aftaná tapið ímóti vertstjóðini, Póllandi í innleiðandi bólkaspælinum. Frakland vann fyrr í dag tryggan 34-23 sigur á Hvítarusslandi. Í fyrra hálvleiki spældu fraklendingar, sum ein dreymur, og tá liðini fóru til steðgin var alt avgjørt. Frakland var á odda heili 20-5 í steðginum. Í seinna hálvleiki slapp Hvítarussland at pynta eitt sindur um endaliga úrslitið. Nikola Karabatic gjørdist toppskjútti hjá Fraklandi við átta málum.
Kroatia vann eisini ein tryggan sigur á Makedonia fyrr í kvøld. Kroatia vann 34-24, aftaná hálvleiksstøðuna 17-13 til Kroatia. Ivan Sliskovic gjørdist toppskjútti hjá Kroatia við seks málum.
Støðan i EM millumbólki 1 =
| 1 | Pólland | 2 | 2 | 0 | 0 | 55:48 | 4 |
| 2 | Noreg | 2 | 2 | 0 | 0 | 63:58 | 4 |
| 3 | Kroatia | 3 | 2 | 0 | 1 | 92:79 | 4 |
| 4 | Frakland | 3 | 2 | 0 | 1 | 89:77 | 4 |
| 5 | Makedonia | 3 | 0 | 0 | 3 | 70:88 | 0 |
| 6 | Hvítarussland | 3 | 0 | 0 | 3 | 71:90 | 0 |
Leygardagin verða tveir rimmar dystir. Klokkan 17.15 spæla Frakland og Kroatia. Og klokkan 19.30 spæla Pólland og Noreg.
