Tummas í Garði, Valevni Fólkaflokksins til býráðsvalið
?????????
Ferðslutrygdin uttan um skúlarnar í býnum eigur at verða betrað.
Allir 18.000 borgarar í býnum eru ófatuliga virðismiklir einstaklingar, og hvørki familjurnar ella býurin kann góðtaka at missa ein av sínum.
Kommunan skal tí hava »0-hugsjónina« sum leiði-stjørnu fyri ferðslupolitikk-in: »eingin skal doyggja ella verða álvarsliga skaddur í ferðsluni«.
Ferðsla í býum er altíð so, at tað eru fólk til gongu ella á súkklu, sum eru í stórst vanda. Ofta børnini og tey ungu.
Tí eigur serligur dentur at verða lagdur á at tryggja ferðsluna uttan um skúlarnar og ítróttarøkini.
Afturat tí sum Ráðið fyri Ferðslutrygd skipar fyri, skal Kommunan aktivt inn at broyta vegir, støðgipláss við skúlar, gongubreytir og ferðavmarkingar osv, so vandin gerst minst møguligur.
Tað er gleðiligt at síggja nýggju, ferð-avmarkandi gonguteigarnar við Kommunuskúlan og Venjingarskúlan.
Gott og bíligt, og átti avgjørt eisini beinanvegin at verði gjørt við Dagstovnarnar longri uppi í Varðagøtu!
Tað er ein ómøgulig uppgáva at gera súkklubreytir allastaðni í býnum, men serligar súkklu/gonguleiðir ígjøgnum býin kunnu fáa fleiri at ganga/súkkla, heldur enn altíð at koyra bil og minka soleiðis ferðslutrýstið uttan um skúlarnar um morgnarnar.
Komandi býráð eigur at lata teknisku fyrisitingina sleppa at arbeiða víðari við hesum. Tey hava førleikan og skulu hava fíggjarjáttan og politiskan stuðul frá býráðnum.
