Trygdarráðið hjá ST fer í dag at viðgera støðuna í Sýrialandi og at taka støðu til møgulig nýggj tiltøk ímóti stýrinum hjá Bashar al-Assad, forseta.
Undan fundinum hevur Ban Ki-moon, aðalskrivari, sagt, at nú má ráðið taka ábyrgd. Aðalskrivarin fordømdi í gjárkvøldið harðskapin í Sýrialandi og serliga bumbuatsóknina í gjár, sum kostaði tveimum ráðharrum og einum vararáðharra lívið. Men hann fordømdi eisini sýriska herin, tí hann brúkar tung vápn ímóti fólki í býunum.
Forsetarnir í USA og Russlandi, Barack Obama og Vladimir Putin, tosaðu í gjár í telefon um tað seinasta, sum er hent í Sýrialandi, og hvat gerast skal. Í einari fráboðan, sum kom úr Hvítu Húsunum aftan á samrøðuna, varð staðfest, at londini eru ikki samd um, hvat skal gerast, men at tey eru samd um at arbeiða saman fyri at loysa kreppuna.
