Hetta síðsta árið eru tríggir føroyingar deyðir á sjónum.
Tað upplýsir skrivstovan hjá bispi, nú minningardagur teirra sjólætnu er nú fríggjadagin, allahalgannadag, 1. november.
Tey trý, sum eru deyð á sjónum síðani 1. november í fjør, eru:
- Maria Fuglø Christiansen 16 ár, druknaði við byrgingina í Hvannasundi tann 21. november.
- Ingi Dam Jacobsen 39 ár, andaðist umborð á Nordkinn tann 24. februar.
- Magnus Holm 60 ár, druknaði á Vágsfirði tann 30. juli.
Eins og undanfarnu ár skipar Føroyska Sjómansmissiónin aftur í ár fyri minningarhaldi teirra sjólætnu.
Tað verður fríggjadagin klokkan 14 á Vinnuháskúlanum í Nóatúni í Havn.
Har fara Kaj Leo Holm Johannesen, løgmaður, og Sverri Steinhólm, prestur, at halda røðu.
Aftaná verður farið niðan til minnisvarðan í Viðalundini, har kransur verður lagdur.
Øll eru vælkomin til minningarhaldið, sigur Sjómansmissiónin.
