- Eftirhondini halda eg, tað er vorðið trupult at fylgja við í føroyskum politikki. Tað er fyrsta viðmerkingin hjá Peter Duetoft, formanni í Føroya-nevndini, til uppskotið, sum landsstýrið nú hevur lagt á borðið.
Hann var ein teirra, sum ikki lat serliga væl at ætlanini hjá landsstýrinum um at halda eina fólkaatkvøðu 26. mai, tí eingin avtala liggur á borðinum millum landsstýrið og stjórnina. Og eins og flestallir av hinum politikarunum á Christiansborg hevur Peter Duetoft tikið undir við einari fýra ára skiftistíð, um Føroyar fara úr ríkinum.
Uttan at kenna allar smálutirnar í nýggjasta uppskotinum, so heldur Peter Duetoft ikki, at landsstýrið hevur flutt seg serliga langt frá upprunaligu ætlanini um fullveldi.
- Í mínum eygum eru vit nú aftur í einari støðu, har landsstýrið ynskir at samráðast um fullveldi. Og har hava vit higartil sagt, at skiftistíðin verður fýra ár, sigur Peter Duetoft og letur skilja, at nýggja ætlanin hjá landsstýrinum helst ikki fer at broyta uppá hesa støðuna.
Peter Duetoft heftir seg við, at talan er um eina fullveldisætlan, og at ætlanin er einaferð í framtíðini at hava eina fólkaatkvøðu um fullveldi. Tað er hetta, sum nívir hann. Ynski um fullveldi verður ballað inn í nakrar orðingar um yvirtøkur og um at minka blokkstuðulin eftir einari skipaðari ætlan.
- Málið er framvegis fullveldi, staðfestir Peter Duetoft. Spurdur, um føroyingar als ikki skulu hugsa um fullveldi, sigur hann, at sjálvandi skulu føroyingar tað.
- Men mann skal siga tað, sum tað er, sigur formaðurin í Føroya-nevndini. Hann fer nú at kalla saman til fundar í Føroya-nevndini og heita á danska forsætisráðharran um at greiða frá nýggja útspælinum frá landsstýrinum. Hesin fundurin verður helst síðst í næstu viku ella í aðru viku.
Nyrup ikki at hitta
Sosialurin royndir at fáa eina viðmerking frá danska forsætisráðharranum til útspælið frá landsstýrinum, men forsætisráðharrin var upptikin, og hetta eydnaðist tískil ikki.
Higartil er tað Nyrup, sum hevur fingið skyldina fyri, at allar ætlanirnar hjá landsstýrinum eru kollsigldar, og tað verður helst hann, sum einaferð seinni í ár skal samráðast við landsstýrið um at minka blokkstuðulin og yvirtaka málsøkini, sum ætlanin er at yvirtaka 1. januar. Tað verður helst eingin trupulleiki at gera eina avtalu um, at blokkstuðulin skal minka, men spurningurin er, hvussu nógv ár fram í tíðina, hendan avtalan røkkur.
Meira hóvlig kós
Og spurningum eru tað ovmikið av, heldur Pia Larsen úr Vinstra, sum eisini er limur í Føroya-nevndini.
- Talan er um eitt uppskot til samtyktar, og tað bindir ikki komandi landsstýri meira enn so, at ætlanin kann broytast aftur. Eingin veit, hvør situr í landsstýrinum aftana eitt komandi løgtingsval. Ynskir tað landsstýrið at halda fram við ætlanunum at minka blokkin, og tekur tað landsstýrið yvirhøvur undir við hesari ætlanini, sum nú liggur á borðinum, spyr hon.
- Tað eru so nógvir ógreiðir lutir í hesum, sigur Pia Larsen, sum kortini heldur, at uppskotið í fyrstu atløgu tykist meira hóvligt enn uppskotið frá 1. februar.
- Sum eg dugi at síggja tað, roynir landsstýrið nú at venda aftur til tær samráðingarnar, sum vóru millum føroysk og donsk embætisfólk um at broyta heimastýrislógina og gera tað lættari at yvirtaka málsøki. Tað er positivt, heldur hon.
Meðan Peter Duetoft heldur, at landsstýrið við hesari ætlanini heldur fram við beinari kós móti fullveldinum, heldur Pia Larsen altso, at talan er um eina samráðingarkós innanfyri ríkisfelagsskapin.
Tey bæði gera kortini vart við, at tað ikki ber til at taka eina endaliga støðu fyri ella ímóti ætlanini, fyrrenn Føroya-nevndin er kunnað um hana.
