Donald Trump, sum nú alment er forsetavalevnið hjá Republikarunum í USA, hevur valt James David Vance sum sítt varaforsetavalevni.
39 ára gamli J.D. Vance er ættaður úr Ohio. Hann er senatorur. Hann varð kendur, tá ið hann gav sjálvævisøguna "Hillbilly Elegy" út. Bókin varð bestseljari. Hon snýr seg um, hvussu fátæksligi uppvøksturin hjá J.D. Vance var. Bókin viðger, hvussu afturgongdin í kol- og stálídnaðinum hevur rakt nógvar arbeiðarafamiljur, og at hesar kenna seg sviknar av ráðandi klassanum í Washington D.C.
J.D. Vance hevur áður verið sera atfinningarsamur ímóti Donald Trump og kallaði hann eina ferð "Amerikanski Hitler". Seinnu árini hevur Vance tó stuðlað Trump heilhjartaður.
Republikanski flokkurin hevur hesa vikuna floksfund í Milwaukee í statinum Wisconsin.
Hósdagin fer Donald Trump at halda røðu á floksfundinum.
