Fyrrverandi amerikanski forsetin, Donald Trump, er komin til statin New Jersey eftir tað, sum FBI lýsir sum eina morðroynd í gjár.
Tað vísa videoupptøkur frá einum flogvølli í statinum, sambært miðlinum MSNBC, skrivar tíðindastovan Reuters klokkan 01 sunnudagin lokala tíð - eitt sindur fyri klokkan 06 okkara tíð.
Trump varð streyfaður av skotum á einum veljarafundi í Butler í Pennsylvania.
Hann fekk síðani viðgerð á nærliggjandi klinikk.
Trump hevur sjálvur upplýst, at hann varð raktur í ovara parti av høgra oyra.
Á videoupptøkum úr New Jersey sæst Trump ómakaleyst flyta seg niðan trappurnar úr einum flogfari.
Tað er ógreitt, hvat Trump fer at gera í New Jersey.
Fyrrverandi forsetin eigur golffelagið Trump National Golf Club Colts Neck, sum liggur umleið 64 kilometrar vestan fyri býin New York í grannastatinum New Jersey.
Umframt golfklubban eigur Trump eisini eina smáttu, sum hann brúkar sum eitt av sínum privatum húsum.
Mánadagin skal Trump væntandi luttaka á republikansku stevnuni, sum byrjar í Milwaukee í statinum Wisconsin.
Tað hava valátakið hjá honum og republikanska landsnevndin (RNC) áður sagt í eini felags fráboðan, sambært Reuters.
Í fráboðanini verður endurtikið, at Trump hevur tað gott eftir skottilburðin leygardagin í statinum Pennsylvania.
Tað er á stevnuni, at republikanararnir formliga velja sítt forsetavalevni. Stevnan verður millum 15. og 18. juli.
Trump vann undanvalið hjá republikanarunum sannførandi. Tí hevur tað í longri tíð bert verið ein formalitetur at seta hann sum forsetavalevni hjá flokkinum.
Forsetaval er í USA 5. november.
Trump var forseti í USA árini 2017 til 2021, og eftir hetta varð sitandi forseti Joe Biden avloystur, sum er valdur fyri demokratarnar.
/ritzau/
