Føroya Arbeiðarafelag fer undir ongum umstøðum at góðtaka, at fakfeløgini skulu fráboða verkfall fimm dagar áðrenn verkfallið verður lýst.
Tað ger Georg F. Hansen, formaður í Føroya arbeiðarafelag, greitt eftir aðalfundin í felagnum í gjár.
Hann sigur, at tá ið sáttmálasamráðingarnar vóru seinast, strongdu arbeiðsgevararnir á at fáa tað í sáttmálan, at verkfall skuldi fráboðast fleiri dagar frammanundan.
- Men har settu verkamannafeløgini hart ímóti hørðum og vildu ikki góðtaka tað undir nøkrum umstøðum.
Men nú hevur Johan Dahl, landsstýrismaður í vinnumálum, lagt uppskot fyri Løgtingið um tað sama.
Georg F. Hansen, heldur, at hetta er beinleiðis at gera seg inn á samráðingarrættin.
Hann sigur, at styrkin hjá fakfeløgunum er nettupp at kunna fara í verkfall frá tíma til tíma, tá ið tað krevst, men skal verkfall fráboðast eina viku frammanundan, fer tað at trekkja tenninar úr fakfeløgunum.
Hann er eisini sannførdur um, at hetta fer at gera, at verkfallini fara at vara enn longri enn annars.
Tá ið arbeiðsgevarar skulu hava góða tíð at fyrireika seg til verkfall, er sannlíkt at tað gongur longri tíð, áðrenn teir hava fyri neyðini at koma til samráðingarborðið aftur.
Men taka vit fiskavirki sum dømi, er støðan í dag tann, at tá ið vandi er fyri verkfalli, so halda tey upp at at keypa fisk. Men skal verkfallið fráboðast, kunnu tey keypa fisk heit til verkfallið verður lýst, tí so fer hann ikki fyri skeyti. Er tað ikki rímiligt?
Nei, tað halda vit slett ikki, sigur Georg F. Hansen.
Hann sigur at styrkin hjá fakfeløgunum er nettupp, at tey hava verkfallið at trýsta við og fær arbeiðsgevarin møguleika at fyrireika seg væl og virðiliga, fer tað bara at draga eitt verkfall óneyðuga leingi út.
Tí fara fakfeløgini aldrin at góðtaka, at verkfall skal fráboðast frammanundan og um neyðugt fara tey at viðgera spurningin um at fara í verkfall, fyri at forða fyri tí, so stóran týdning hevur tað fyri fakfeløgini
