Italski landsliðsvernjarin Giovanni Trapattoni hevur ilt við at skilja, at hansara lið ikki longur er við í EM-kappingini.
? Eg hevði væntað mær meira av Totti, Del Piero og Vieri, men fyri at vera púra erligur, so ber tað ikki til at geva teimum alla skyldina, sigur Trapattoni.
? Del Piero kundi havt fingið meira burtur úr við røttu hjálpini. Totti hann sveik okkum og ger neyvan slíkt aftur, og Vieri vildi sleppa at spæla, hóast hann var skaddur í knænum, sigur Trapattoni, sum heldur, at eydnan var ikki við italska liðnum.
Sáttmálin hjá Trapattoni við italska fótbóltssambandið gongur út í juli, og hann ætlar sær ikki at leingja sáttmálan.
