Komandi vikuskiftið vera tríggjar eykasýningar av leikinum Poe morðini. Leygarkvøldið 6. oktober verður ein miðnáttarsýning kl. 23.00 til teirra, sum vilja hava eitt eyka kryddarí til spennandi upplivingina sum Poe morðini eru.
Her hava øll, ið hava áhuga fyri Poe ella føla seg drignan at tí makabra ella bara vilja uppliva nakað, sum er nýtt og øðrvísi, nakað at gleða seg til. Í eini atmosferu, sum er ørvísi enn tann vit vanliga uppliva í Sjónleikarhúsinum, við kertiljósum og skýmligum krókum verður borðreitt við tekstum, sum glógva sum tinnur í heimsins bókmentum, skrivar Sjónleikarhúsið:
Tá vit lesa Poe, verða vit drigin inn í ein heim, har vit alla tíðina ferðast á eggini og í daprastu avkrókum tilvitskunnar. Í eini søgu letur hann detektivin Dupin siga: »Deyðin hjá eini vakrari kvinnu er, ongin ivi um tað, tað mest poetiska evnið í heiminum«.
Ónatúrligi deyðin, fólk, ið doyggja ov ung. Fólk, ið vera upptærd av sálarsjúku. Tey, ið av tilvild, ella tilvitað gerast mordarar og so tey, ið gerast offur fyri brotsgerðum, verða dripin, ella jarðað livandi. Mordarin er sum oftast, fyri Poe, meira áhugaverdur enn offrið.
