Tríggir mans hava meir ella minni spælt sær av við koyrikortið hetta vikuskiftið fyri at koyra við kenning ella fyri spirituskoyring.
Ein bilførari varð tikin umleið klokkan hálvgum eitt í Hoyvík fyri at koyra við kenning. Klokkan hálvum fimm somu náttina steðgaði løgreglan einum bili mitt í Havnini, og vísti tað seg at vera enn ein ávirkaður bilførari. Hvørt talan var um promillu- ella spirituskpyring hjá hesum báðum, verður ikki nevnt í rapportini, men er talan í øllum førum um ávirkan omanfyri 0,5 promille.
Tann triðji í røðini varð tikin í Klaksvík sunnunáttina beint eftir midnátt. Hesin koyrdi við meira enn einari kenning, also spirituskoyring.
Seinni fekk løgreglan í Klaksvík fráboðan um, at ein maður var til ampa inni í »Maverick« í Klaksvík, og talan vísti seg at vera um sama mann. Tá løgreglan kom á staðið, hevði hann tó gjørt seg til at fara avstað, og tað var tí ikki neyðugt at hjálpa honum til hús.
Í Klaksvík var eisini ein fráboðan um stuldur. Um klokkan fýra leygardagin fekk løgreglan eina fráboðan um at ein pengakassi var stolin frá eini fyritøku í Klaksvík. Illgruni var um ein persón, at hesin skuldi hava framt stuldurin, og tá løgreglan setti seg í samband við viðkomandi, játtaði hesin seg so sekan í stuldrinum.
