Trý føroyingalið taptu sínar dystir

Talan gjørdist ikki um ein góðan dag hjá føroyingunum í næstbestu donsku fótbóltsdeildini.

Vejle, Vendsyssel FF og Fremad Amager taptu øll sínar dystir. Á vøllinum í Nørreskoven í Vejle tók Vejle við Viljormi Davidsen í verjuni imóti HB Køge. Longu tá 10 minuttir vóru farnir var galið hjá Vejle, tá Gael Ondoua hjá heimaliðnum fekk reyða kortið. Viljormur og liðfelagarnir máttu stríðast í 80 minuttir 10 ímóti 11 monnum, og tað helt heldur ikki. HB Køge vann 1-0 við einum máli, sum Alexander Bah skoraði í 43. minutti.

Meinhard E. Olsen byrjaði inni hjá Vendsyssel FF, sum tók ímóti botnliðnum Fredericia FC. Heldur óvæntað tapti heimaliðið dystin í Hjørring. Tá eitt korter var farið av dystinum skoraði Morten Bech Andersen fyri Fredericia FC, og tann leiðslan helt allan dystin. Vendsyssel FF royndi at trýsta Fredericia í seinna hálvleiki, men tað eydnaðist ikki heimaliðnum at koma á máltalvuna.

Felagið hjá Jákupi Thomsen, Skive IK tók ímóti Fremad Amager. Finnur Justinussen var við á liðnum hjá Fremad Amager frá dystarbyrjan, men tað gekk av skriðuni hjá Finni og liðfeløgunum. Skive vann ein sannførandi 4-1 sigur. Í steðginum var Skive á odda 3-1. Mike Mortensen javnaði til 1-1 fyri Fremad Amager, tá 19 minuttir vóru farnir, men Skive kom skjótt á sigurskós aftur. 

Skírisdag verður føroyingauppgerð millum Fremad Amager og Vendsyssel FF á leikvøllinum í Sundby á Amager. Sama dag tekur Vejle ímóti Nykøbing. Felagið hjá Jákupi Thomsen, Skive spælir á útivølli ímóti Fredericia FC.

Støðan: