Toymið í verkætlanini ABC fyri sálarliga heilsu hevur verið støðugt vaksandi seinastu tíðina.
Ergoterapeutfelagið og Barna- og ungdómspsykiatriska toymið gjørdust fyri stuttum partur av verkætlanini, og nú kann Fólkaheilsuráðið avdúka, at eisini Fysioterapeutfelag Føroya hevur tikið stig til at vera við.
- Vit hava nú ein sera breiðan skara av samstarvsfeløgum í verkætlanini hjá okkum, og hetta er ómetaliga gott. Eitt nú hevur hetta við sær, at fleiri og fleiri møguleikar eru hjá ymisku feløgunum, stovnunum og kommununum at samstarva.
Fólkaheilsuráðið vísir á, at nýggj samstørv kunnu skapa nýggj og spennandi átøk, sum kunnu gagna borgarunum. Tí verður eisini spennandi at síggja, um nýggj samstørv spretta, bæði innanhýsis í ABC toyminum og uttanhýsis í 2019.
Monika Mohr, ABC verkætlanarleiðari í Fólkaheilsuráðnum, sigur, at ABC toymið nú fevnir um 20 ymisk feløg, stovnar og kommunur kring alt landið, og Fólkaheilsuráðið fegnast um veksandi áhugan fyri verkætlanini.
Fysioterapeutfelag Føroya sigur soleiðis um teirra nýggja leiklut í verkætlanini:
- Vit gleðast um at gerast ein partur av samstarvinum ABC fyri sálarligari heilsu. Vit meta, at eins og kropslig heilsa hevur týdning fyri at menniskju hava ein virknan og sjálvstøðugan gerandisdag, so hevur sálarlig heilsa eisini stóran týdning fyri, at menniskju kunna verða virkin, bæði sum einstaklingar og sum ein partur av samfelagnum.
Fysioterapeutfelag Føroya viðurkennir sostatt tað, sum Fólkaheilsuráðið strembar eftir, nevniliga at tað hevur líka stóran týdning at leggja dent á sálarligu heilsuna sum kropsligu heilsuna, eisini tá viðvíkur einum virknum og sjálvstøðugum gerandisdag.
Magni Mohr, formaður í Fólkaheilsuráðnum fegnast eisini um, at Fysioterapeutfelag Føroya er blivið partur av verkætlanini og vónar, at fleiri fara at leggjast aftrat.
