B36 er topplið, og B71 er botnlið. Seinnapartin leygardagin verður møguleiki í Gundadali at síggja, hvussu stórur munur tað er á toppliðnum og botnliðnum.
Síðani eftir 7. umfar hava sandoyingar verið á aftasta plássinum, og tað er longu greitt, at B71 næsta kappingarár skal spæla í næstbestu deildini. B36 hevur síðani eftir 5. umfar verið fremst og harvið favorittur at vinna meistaraheitið.
Eftir 2-1 heimatapið ímóti EB/Streymi, og eftir at EB/Streymur í gjárkvøldið vann fulla úrtøku ímóti ÍF, er munurin frá B36 og aftur til EB/Streym tódnaður til tvey stig. So lítil hevur B36 leiðslan ikki verið síðani eftir 18. umfar, tá ið Víkingur bara var eitt stig aftanfyri B36.
– Lagið er gott í hópinum, og tað er framvegis kapping um plássini. Vit fara við eyðmýkt undir hesa uppgávuna, og um vit vísa rætta hugburðin og harvið stríðast og spæla fyri søkini, so vita vit, at tað ber okkum til at vinna, verður sagt úr B36 leguni.
Allir teir B71 spælararnir, sum sunnudagin vóru við til at tapa 3-0 á heimavølli ímóti Víkingi, eru tøkir hesa ferð.
Tað hava verið rættuliga fáar broytingar í B36 verjuni higartil, men hesa ferð verður øðrvísi. Vinstri vongverjin Símun Joensen er leikbannaður eftir útvísingina ímóti EB/Streymi, og miðverjin Odmar Færø er farin til Skotlands at lesa.
Tað er rættuliga sannlíkt, at Kenneth Jacobsen verður avloysari í vinstra borði, og at onkur av teimum, sum kappast um plássini á miðvøllinum, verður fluttur aftur í miðverjuna – Klæmint Matras, Atli Danielsen ella Súni Olsen.
Álopsspælarin Mahmud Suleiman hevur leingi verið plágaður av skaða í fótinum. Nú er hann tøkur aftur.
Tá ið B71 í 2. umfari vitjaði í Gundadali, var úrslitið 4-1 til heimaliðið.
