Toppdystur í Okkaradeildini í kvøld

Okkaradeildin:

Klokkan 20.00: Kyndil - Team Klaksvík, Høllin á Hálsi.

Klokkan 20.00: H71 - VÍF, Hoyvíkshøllin. (FM1 sigur frá).

Botndystur og toppdystur eru á skránni í Okkaradeildini í kvøld.

Á Høllini á Hálsi ætlar Kyndil sær at vinna sær eina lítla vón um at tað kann eydnast at bjóða av um fýra fremstu plássini, meðan VÍF ætlar sær at leggja seg undir liðina á H71 á oddasessinum.

Hetta var at lesa um H71 og VÍF í Ítrottarsosialinum mánadagin:

H71 hevur verið favorittur til allar sínar dystir, og tað verða Føroyameistararnir eisini mikukvøldið. Men VÍF er í einum sera góðum stima. Vestmenningar vóru í trongum skóm, tá ið teir tíðliga á árinum taptu ímóti H71 og KÍF, men síðani reistu teir seg við tveimum javnleikum og so fýra sigrum á rað.

Breiddin ger H71 til favoritt

Tað skal kortini ganga vestmenningum rættiliga væl um tað skal eydnast at basa H71 í Hoyvík. Munurin á liðnum er breiddin. Teir fyrstu sjey ella kanska átta leikararnir hjá VÍF skulu raka eitt høgt støði allan dystin, so hevur VÍF ein møguleika. Serliga um Mladen Mjerimacka fær bjargingar og Filip Jojic sleppur til skot.

Tað, ið ger H71 til favorittar er, at teir fyrstu sjey helst eru á minst sama støði sum VÍF, men at teir næstu sjey so eru eitt støði omanfyri, um vit skulu gera eina skjóta meting.

Vinnur H71 dystin kunnu Føroyameistararnir venja seg við, at miðlarnir fara gerast fullvísir í, at H71 tekur fremsta plássið í grundspælinum. Vinnur VÍF dystin, fara miðlarnir at fegnast um ein ovurstóran spenning, nú grundspælið er meira enn hálvliðið.

Sosialurin kann keypast á netinum á www.sosialurin.fo

Innanhýsis dystir

Støðan í Okkaradeildini