Tony Rasmussen skal næsta ár fyri fyrstu ferð nakrantíð royna seg í Formula deildini. Tað gjørdist greitt týsdagin, tá ið Tony Rasmussen og Skála Ítróttarfelag skrivaðu undir sáttmála, sum er galdandi fyri 2007.
Tony er 23 ára gamal og 181 centimetrar høgur. Sambært heimasíðuni hjá Skála Ítróttarfelag er tað eftir ynski frá nýggja Skála venjaranum, Dragan Kovacevic, at felagið hevur fingið havnarmannin inn á Skála. Tony Rasmussen spældi barna- og unglingaárini í HB. Hann varð ongantíð rættuliga partur av besta liðnum, og seinastu trý árini hevur hann spælt í næstbestu deildini, har hann hevur umboðað AB.
Heimasíðan hjá Skála lýsir Tony at vera all-round spælara, og tá ið hann er rættuliga skjótur hevur hann helst sína styrki í høgru síðu á miðvøllinum, har hann er førur fyri at renna frá teimum flestu, sigur heimasíðan. Harvið er lagt upp til, at Tony skal loysa Bjarna Jørgensen av. Hann er fyri stuttum síðani farin av Skála, tí hann hevur skrivað undir sáttmála við – AB!
