Leygardagin 17. mai frá klokkan 15 til klokkan 22, verður eitt heilt óvanligt tiltak á Eysturoyar Ellis- og Røktarheimi í Runavík.
Tað verður nevniliga ein Seniorfestivalur á røktarheiminum í Runavík og á stykkinum rundan um heimið.
Har fara eini 10 – 12 vælumtóktir tónleikabólkar at syngja og spæla. Fyribils er greitt, at Magni Christiansen, Sámal Ravnsfjall, Jens Lisberg og Árni Andreassen, fara at spæla og syngja, men fleiri nøvn verða avdúkað í næstum.
Hendan festivaldagin verða pallur, og tvey tjøld sett upp á parkeringsøkinum omanfyri heimið, men sjálvt Røktarheimið er eisini opið fyri festivalgestunum.
- Eingin nýtist at ganga svangur, tí møguleiki verður at keypa ymiskt gott til matna, siga tey á Ellis- og røktarheiminum.
Tey gera vart við, at ongin parkering verður á økinum hendan dagin og tískil verður víst til parkeringsøkið við Ítróttar og Støkkhøllina, læknamiðstøðina, Løkshøll og aðrastaðnis í nánd.
Sum orðið sigur, so er festivalurin ætlaður seniorum, eldri fólki . - Vit hava ikki sett nakað aldursmark, so at tey, ið føla seg at vera seniorar, eru vælkomin, sigur Thordur Niclasen, fyristøðumaður. Men hann leggur afturat, at festivalurin ikki er ætlaður børnum og ungum!
Hann sigur, at tað er avmarkað, hvussu nógv fólk sleppa á festivalin og sostatt er talið á atgongumerkjum avmarkað.
|
