DANMARK
Christian Høgni Jacobsen var fremsti maður á landsliðnum leygardagin. Sunnudagin fór hann aftur til Danmarkar og Vejle. Í gjárkvøldið var nýtt umfar í 1. deild á skránni. Vejle skuldi á útivølli spæla ímóti FC Aarhus. Tá blaðið fór til prentingar, var dysturin ikki spældur.
Í morgin venda vit aftur til, um fremsti maður á landsliðnum var í Vejle álopinum, ella um hann var á vongverjanum, har hann var, tá Vejle síðst spældi. Undan dystinum var greitt, at Peter Degn, sum Vejle hevur leigað í Brøndby, og sum hevur verið eitt sindur skaddur, síðani hann skifti felag, fór at vera tøkur.
Í Veje vilja teir fegnir vera við í kappingini um tey bæði fremstu plássini og harvið uppflytingina til superliguna. Tá teir spældu seinast, snávaðu teir orduliga. Teir høvdu sunnudagin 1. september vitjan av Fredericia, sum altíð hevur verið mettur sum fótbóltsligi lítlibeiggin í tríkantsøkinum, men Fredericia vann 1?0 í Vejle.
Meiri pláss til Toda
Á landsliðnum hevur Christian Høgni Jacobsen seinast stóra árið verið í plássinum, sum Todi Jónsson frammanundan var sjálvskrivaður til. Todi heldur framvegis fyribils frí frá landsliðsfótbólti.
Superligan hevði frí í vikuskiftinum. Danmark spældi EM undankappingardyst í Oslo.
Í kvøld fer bólturin aftur á rull í superliguni. Øll fjúrtan liðini skulu í eldin. FCK skal spæla á útivølli í Esbjerg. Teir vóna, at tað skal hilnast betur, enn tað gjørdi, tá FCK seinast var í Jyllandi. Tá taptu teir 3?0 í Aalborg.
Fyritreytirnar undan dystinum í Esbjerg eru ikki tær bestu. Fýra av spælarunum, sum plaga at vera á liðnum, eru ikki tøkir. Málverjin Magnus Kihlstedt er skaddur og verður ikki við tann næsta mánaðin. Og harafturat eru tríggir spælarar leikbannaðir, tí teir sóu gult og reytt í Aalborg. Talan er um verjuspælaran Bo Svensson, miðvallaran Erik Mykland og álopsspælaran Sibusiso Zuma.
FCK liðformaðurin, Christian Lønstrup, heldur ikki, at teir fyrstu ellivu fara at verða verri fyri, enn teir plaga at vera. Men hann heldur ikki, at tað kann roknast við, at innskiftingar í 2. hálvleiki kunnu verða so avgerandi, sum tær hava verið í fleiri av undanfarnu landskappingardystunum. Tá hava klassaspælarar sitið á beinkinum. Liðformaðurin heldur ikki, at spælaratilfarið er so gott, at tað ikki kennist á beinkinum, tá fýra av teimum bestu eru burtur frá.
At Zuma ikki er við í Esbjerg eigur at gera tað eitt sindur lættari hjá Toda Jónsson at sleppa framat í álopinum. Nú eru teir tríggir, sum kappast um tvey pláss. Umframt Toda er talan um Peter Møller og Jörgen Petersson. Uttan at vit hava fingið nakað sum helst ítøkiligt at vita um tað, so kundi tað hugsast, at Todi verður annar í álopinum, og at annar av hinum báðum verður á beinkinum. Spælistílurin hjá teimum báðum er rættuliga líkur.
Hinir dystirnir í superliguni í kvøld eru hesir: AB?Farum, Køge?FCM, OB?AaB, Silkeborg?Viborg og AGF?Brøndby. Áhugin fyri fótbólti er stórur í Danmark. Tað eru eingi atgongumerki eftir til dystin í Århus, og í Esbjerg roknaðu teir í gjár við, at tey síðstu standiplássini fóru at vera seld, áðrenn Todi og teir koma á vitjan í kvøld.
