- Eg harmist um, at onkur kann kenna seg stoyttan av hesi lýsingini. Tað var ikki ætlanin at diskriminera kvinnur uppá nakran sum helst máta, sigur Ernst Jacobsen, stjóri í ALS, sum tí heldur, at gentan í lýsingini var anstendigt ílatin, sum hann tekur til.
Hann sigur hetta í samband við eina viðmerking, sum vit prentaðu fyrr í dag (sí viðheftu greinina).
Her vísti ein lesari á, at viðkomandi kendi seg stoytta yvir eina lýsing um eitt skeið í handverki, sum skal byrja fyrst í komandi ári.
Hetta var eitt skeið sum vendi sær til ungfólk og serliga kvinnur, sum her fáa møguleika at fáa ein tríggjar mánaðir intensiva útbúgving innan handverk. Hetta er annars eitt mansdominerað fak, men nú varð miðað eftir at fáa kvinnur at tekna seg til hetta.
Tað var tí eisini orsøkin til, at ein hevði valt at brúka eina mynd av eini ungari, frískari og fríari kvinnu, sum stóð tilbúgvin at fara til arbeiðis sum handverkari.
- Og í dag kunnu vit bara staðfesta, at hetta hevur eydnast okkum. Lýsingin stóð í bløðunum um vikuskiftið, og fyri lítlari løtu síðani høvdu longu sjey fólk teknað seg til skeiðið harav tvær kvinnur. Tí vil eg siga, at henda lýsingin so avgjørt hevur rakt málbólkin, vísir Ernst Jacobsen á.
Ætlanin er annars at 16 fólk skulu sleppa á hetta fyrsta skeiðið. Ætlanin er at skipa fyri øðrum førleikamennandi skeiðum í 2012.
(Mynd: Norðlýsið hevur verið parturav førleikamenningini hjá ALS. Nú tekur ALS næsta stigið og bjóðar til handverkaraskeið - í miðjuni ALS-stjórin, Ernst Jacobsen)
