Ein fundur í tjóðartinginum í Venesuela fyrrakvøldið endaði við, at tingmenn fóru til hendurs. Bardagin byrjaði, tá tingmaðurin Henry Ventura, sum er úr stjórnarflokkinum hjá Hugo Chavez, forseta, royndi at skumpa andstøðupolitikaran Alfonso Marquina burtur frá røðarapallinum. Tað endaði við, at aðrir tingmenn løgdu uppí, og so var alt í einum hurlivasa.
Tað tók fleiri minuttir at skilja teir illu tingmenninar sundur, men sambært tíðindastovunum fekk eingin skaða. Tað almenna sjónvarpið sendi beinleiðis frá tingfundinum, men kvetti sendingina av, tá bardagain byrjaði.
Tað er ikki heilt óvanligt, at tingmenn í øðrum londum fara til hendurs. Í tjóðartinginum í Bolivia høvdu menn nevan á lofti á einum tingfundi í 2007, og ta ferðina fóru myndirnar um allan heimin.
