- Í sambandi við, at vit í Føroyum fyrireika okkum til eina møguliga influensuheimsfarsótt, hava vit eins og okkara grannalond tørv á einari tilbúgvingarætlan á økinum.
- Tað týdningarmesta í eini tílíkari ætlan er at tryggja tað neyðuga koppingarevnið. Á hesum økinum eru føroysku heilsumyndugleikarnir væl fyrireikaðir og í tøttum samstarvi við okkara Norðanlond.
Tað eru tó eisini aðrir partar, ið skulu koma upp á pláss í eini tilbúgvingarætlan, sum t. d. greiðar mannagongdir viðvíkjandi kunning, viðgerðarháttir, antibiotikaviðgerð, isolatión, sóttverjufyriskipanir v. m. Í hesum sambandi skipaði Almanna- og heilsumálaráðið í síðstu viku fyri einum innanhýsis fundi í hesum sambandi.
Niðurstøðan á fundinum varð, at tørvur er á at seta ein arbeiðsbólk við fakfólki til at gera eina tilbúgvingarætlan fyri Føroyar í sambandi við eina møguliga influensu heimsfarsótt.
Arbeiðsbólkurin skal verða liðugur við eina tílíka tilbúgvingarætlan í seinasta lagi tann 1. juni 2006.
Víst verður annars til heimasíðurnar hjá ávíkavist Almanna- og heilsumálaráðnum: www.ahr.fo og Apotekinum: www.apotek.fo.
