Nærum helvtin av øllum føroyingum yvir 14 ár pendla til og frá arbeiði ella skúla, tað vil siga, tey arbeiða ella ganga í skúla í aðrari bygd ella býi enn tey búgva í. Meðan tað í flestu støðum er javnt býtt millum hvussu nógv penda til og frá, so skilir Tórshavn seg fullkomiliga burtur úr.
Tað er einasta økið í landinum, har nógv fleiri pendla til enn frá. Har eru 2.668, ið dagliga pendla til Tórshavnarøkið, og bert 466, ið pendla úr Tórshavnarøkinum til onnur øki í landinum. Tað er ein munur ella nettotilpendling á 2.202 fólk, boðar Hagstovan frá.
Í Norðoyggjum eru 174 fleiri, ið pendla frá enn til. Í Eysturoy eru 733 fleiri, ið pendla frá enn til. Í Streymoy annars (t.v.s. Streymoy uttan fyri høvuðsstaðarøkið) pendla 789 fleiri frá enn til. Í Vágum 294 fleiri frá enn til. Í Sandoyarøkinum 122 fleiri frá enn til og í Suðuroy 90 fleiri, ið pendla frá enn til.
