Nýtslan av rúsandi evnum og rúsdrekka er minkað nógv í Íslandi seinastu áratíggjuni - meir enn í nøkrum øðrum Evropeiskum landi, tað skrivar the Independent.
Í 1998 høvdu 42 prosent av teimum 15 til 16 ára gomlu drukkið seg full seinasta mánaðin, og í dag er tað talið minkað niður til fimm prosent. Nýtslan av kannabis er eisini minkað frá 17 prosentum niður á 7 prosent, og talið av teimum sum roykja siggarettir er minkað frá 23 prosentum og heilt niður á 3 prosent.
Ein spurnarskema varð latið øllum íslendskum ungdómi millum 14-16 ár í 1992 og spurt varð um, hvussu nýtslan av rúsevnum var, hvussu samband teirra var við foreldrini var og hvørji frítíðarítriv tey høvdu. Úrslitini vóru skelkandi.
Kanningarnar vístu, at tað sum eyðkendi tey, sum brúktu minni rúsevni, var at tey vóru aktiv í skipaðum frítíðarvirksemi og tey brúktu meir tíð saman við foreldrum sínum um vikuna.
Síðani vóru lógarbroytingar framdar og tiltøk sett í verk í Íslandi, og tað var millum annað sett 18 ára aldursmark á keyp av tubbakki og 20 ára aldursmark á keyp av rúsdrekka. Eisini var upplýst um týdningin av at foreldur brúka tíð saman við børnunum, kenna vinir teirra og tosa við tey um, hvat fyriferst í lívi teirra. Eisini var lógin broytt, soleiðis at ung millum 13 og 16 ár ikki sluppu at ganga úti um kvøldarnar eftir kl 22. Umframt hetta varð peningur settur av til skipað frítíðarvirksemi, so sum ítrótt, dans, list og tónleik.
Les greinina hjá the Independent her
