Tey stóru vístu vegin

Tottenham, sum undan jólini, var í oddinum í Premier League, misti stevið eftir ósigurin á Anfield móti Liverpool, men í gjár bragdaði aftur.

Tottenham vann 3-0 á Leeds á heimavølli. Harry Kane og Heung-Min Son skoraðu – sum vanligt – meðan Toby Alderweireld fekk tað triðja. Meðan Harry Kane og Heung-Min Son eru stóru stjørnurnar, so fær danski miðvallarin, Pierre-Emile Højbjerg, nógv rós. Stríðsmaðurin kom úr Southampton undan hesum kappingarárinum fyri beint yvir hundrað milliónir krónur.

Arsenal hevur verið nærmast niðurflytingarvanda, men við 4-0 sigri á West Bromwich, hevur London-felagið nú vunnið tríggjar ferðir upp í slag. Mikel Arteta og hansara menn nærkast nú ovaru hálvu á stigatalvuni.

Skotski Kieran Tierney legði fyri við 1-0 málinum, meðan unga stjørnuskotið, Bukayo Saka, økti til 2-0. Alexandre Lacazette setti punktum við málum til 3-0 og 4-0 í seinna hálvleiki.

Málríkasti dysturin var millum Brighton og Wolverhampton. Her endaði tað 3-3, eftir at Wolverhampton var á odda 3-1 í hálvleikinum. Sheffield United hevur tað torført, eftir bara tvey stig í 17 dystum. Í gjár tapti Sheffield United fyri 15 ferð í hesum kappingarárinum. Hesa ferð 2-0 móti Crystal Palace.

Tríggir dystir vóru upprunaliga á skránni, men dysturin millum Burnley og Fulham er útsettur vegna koronusmittuútbrot í hópinum hjá Fulham. Í hinum báðum dystunum tekur Newcastle móti Leicester, og Chelsea far vitjan av Manchester City.