Í mong ár hava tey Konservativu í Danmark verið lítlibeiggi hjá Vinstra í bláa veingi í Fólkatinginum. Men kaga vit í seinastu veljarakanning frá Voxmeter høvdu flokkarnir býtt um, um val var í dag.
Meiningakanningin, sum er gjørd frá 8. til 15. februar, gevur teimum Konservativu 12,9 prosent av atkvøðunum. Vinstri fær 11,8 prosent, sum er umleið helvtin av tí, sum flokkurin fekk á valinum 5. juni í 2019. Tað er fyrstu fær nakrantíð, at Voxmeter mátar tey Konservativu at vera størri enn Vinstra.
Vinstri hevur í longri tíð verið merkt av persónstrupulleikum, sum hava ført við sær, at bæði fyrrverandi forsætisráðharrin, Lars Løkke Rasmussen, og fyrrverandi næstforkvinnan, Inger Støjberg, vóru farin úr flokkinum.
Síðstnevnda fór úr flokkinum 4. februar og Voxmeter-kanningin er harvið tann fyrsta, sum er gjørdi eftir at hon fór úr flokkinum.
So hvørt sum tey Konservativu eru gingin fram og Vinstri gingin aftur, hava alsamt fleiri sett spurningin, um leiðarin hjá teimum Konservativu, Søren Pape Poulsen, er veruliga forsetavalevnið.
Formaðurin í Vinstra, Jakob Elleman-Jensen, segði í januar, at Vinstri við sínum 40 tingfólkum í Fólkatinginum – sum er greitt størsti flokkurin í bláa veingi – »er stóra djórið á savannuni«.
Sjálvt um djórini á bláu savannuni tykjast broytast í vekt, skuldi komið eitt fólkatingsval, so avvísir Søren Pape Poulsen, at hann er forsætisráðharravalevni.
– Størsta mistakið, eg kann gera, er at fara at hugsa um tað beint nú, tí so hevði eg bara mist fokus. Tað, sum hevur týdning fyri meg, er, at borgarligu flokkarnir fáa 90 fólkatingssessir.
– So er tað so, at tað kann broytast sum frálíður. Og eg fari ikki at leggja hondina á kókiplátuna og siga, at um vit fingu 50 sessir í morgin, hevði eg hildið meg burtur, segði hann við Berlingske mikudagin.
Voxmeter mátar Javnaðarflokkin til 32,9 prosent, tey Radikalu til 5,6, SF til 7,1 og Eindarlistan til 8,7 prosent. Og harvið hevur reyði vongur framvegis greiðan meiriluta við 99 tingsessum.
Nýggju Borgarligu fáa bestu máting nakrantíð við 8,4 prosentum, meðan Danski Fólkaflokkurin bara fær 6,6 prosent.
Hvørki Alternativið, sum fekk nýggjan leiðara í síðstu viku, Veganaraflokkurin ella Kristindemokratarnir standa í kanningini til at koma upp um sperrumarkið.
Meiningakanningin er gjørd millum 1040 umboðandi útvaldar persónar og hevur eina mestu óvissu upp á 2,9 prosent.
/ritzau/
