- Eg havi sitið uppi alla nátt. Hevði Taleban havt skotið gíslarnar, hevði eg vitað tað, sigur afghanski generalurin Ali Shah Ahmadzai.
Generalurin er ovasti fyri løgregluni í Ghazari-landslutinum, har Taleban burturflutti 23 suðurkoreanar fyri átta døgum síðani. Síðani hevur løgreglan kringsett staðið, har burturflytararnir fjala teir 23 gíslarnar.
Gjáramorgunin skutu burturflytararnir ein av gíslunum, og seinni varð líkið av honum funnið. Sambært løgreglumonnunum, sum funnu líkið, var maðurin skotin fleiri ferðir. Samstundis kunngjørdi Taleban, at ein av gíslunum var avrættaður.
- Eftir sum umsitingin í Kabul ikki er gingin kravi okkara um at lata felagar okkara leysar á møti, hava vit avrættað ein av gíslunum, stóð í kunngerðini frá Taleban.
Forsetin varin
Afghanski forsetin, Hamid Karzai, hevur sagt, at myndugleikarnir fara ikki at eftirlíka kravinum frá burturflytarunum. Tað gjørdi stjórnin fyri einum hálvum ári síðani, tá nakrir fangar vórðu latnir leysir í býti við ein italskan tíðindamann. Tá var Hamid Karzai fyri hvøssum atfinningum, og fleiri vildu vera við, at avgerð hansara at slaka fyri Taleban fór at elva til fleiri burturflytingar.
Tað, sum nú er hent teimum 23 suðurkoreanunum, bendir á, at tey atfinningarsomu fingu rætt. Sambært afghonsku myndugleikunum hava leiðarar í lokalum ættarbólkum roynt at fáa Taleban at lata gíslarnar leysar, men til fánýtis.
Afghonsku myndugleikarnir halda, at umleið 70 Taleban-limir halda vakt uppi yvir gíslunum.
