Higartil í ár hevur tað ikki gingið alt ov væl hjá silvurvinnarunum frá í fjør, StíF, men mikukvøldið vóru tær nær við at taka stig frá føroyameistarunum úr Kyndli, sum vóru á vitjan á Skála.
Heimaliðið fekk eina sera góða byrjan upp á dystin, og tá ið seks minuttir vóru leiktir, vóru tær á odda 4-0. Tá fyrst vaknaði Kyndlaliðið og komu upp á javnleik 4-4. Nú gekk javnt á eina løtu, men so fór StíF aftur frá Kyndli, sum fekk stórar trupulleikar í sínum álopsspæli. Nógvar av royndunum gjørdust alt ov óneyvar, og tað, sum rakti innan fyri málrammurnar, tók vælspælandi málverjin hjá StíF, Óluva Djurhuus, sær av. Gestirnir blakaðu hesa løtuna eisini nógvar bóltar í hendurnar á heimaliðnum, tá ið tær vóru á veg í álop, og so kundi StíF ístaðin fyri skjótálop og skora, hóast Hanna Rubeksen í Kyndlamálinum hevði fleiri góðar bjargingar. Alt hetta gjørdi so tað, at StíF kundi fara til hálvleiks við eini tveymálsleiðslu áljóðandi 10-8.
Hamskift Kyndlalið
Tað var eitt nógv meiri uppsett Kyndlalið, sum kom út til seinna hálvleik. Verjan fór nú at virka, sum hon skuldi, og serliga var tað Beinta Sørensen, sum stóran part av dystinum bert leikti í verjuni, sum spældi ein branddyst. Havi ikki tal, hvussu nógvar skotroyndir hjá serliga Sóley Mikkelsen, ið hon fekk blokerað, men tær vóru nógvar í tali. Hetta gav Kyndli tí neyðugu orkuna, og samstundis byrjaðu fleiri av leikarunum hja StíF at møðast. Hetta sást eisini aftur í avgerandi
løtuni í dystinum, tá ið Kyndil kom frá at verða aftan fyri 12-13 og legði seg 16-13 upp á átta minuttir. Strandakvinnur komu við aftur í dystin og fingu minkað um munin til 15-16 og 16-17, men so sendi Kyndla-venjarin, Sophus Dal-Christiansen, Beintu Sørensen við í álop, og hon gjørdi tvey mál á rað, so at Kyndil kom á odda 19-16, og bert
ein minuttur var eftir at leika. Tað fyrra málið gjørdi Beinta, tá ið føroyameistararnir enntá vóru ein leikari minni á vøllinum, tí at Frida Johannesen stutt frammanundan var útvíst í tveir minuttir.
Haraftrat skal tað nevnast, at tá ið støðan var 18-16, fekk StíF brotskast, men eykamálverjin hjá Kyndil, Marita Hermansen, bjargaði
royndini hjá Sóley Mikkelsen, eins og hon gjørdi móti endanum av fyrra hálvleiki. StíF fekk tó eitt mál aftrat, so at endaliga støðan av spennandi dystinum, gjørdist 19-17 til grønklæddu føroyameistararnar úr Havn.
Kyndil størri breidd
Tað, sum gjørdist avgerandi fyri úrslitið av dystinum, var, at gestirnir úr Kyndil høvdu fleiri streingir at spæla upp á í mun til strandakvinnurnar. Hetta sæst eisini týðuliga aftur á málskjúttaralistanum, har Sóley Mikkelsen skeyt nærum helmingin av øllum málunum hjá StíF, meðan besti málskjúttin hjá Kyndil, Herborg Joensen, skeyt fýra mál. Heimaliðið hevði alt ov fáar leikarar, ið tordu at taka ábyrgd, tá ið á stóð, og hetta førdi við sær, at tær
fleiri ferðir blivu dømdir fyri nøl, tí at ongin tordi at royna seg við einum skoti upp á mál. Haraftrat høvdu Kyndla-kvinnurnar betur orku enn vertirnir, og hetta sást best aftur, sum tað leið móti dystarenda. Hevði verjuparturin hjá Kyndli ikki dovnað eitt sindur seinastu tíggju minuttirnar, so høvdu tær óivað vunnið ein munandi tryggari sigur. Ístaðin loyvdu tær StíF at verða verandi í dystinum, millum annað orsakað av onkrari býttari útvísing og slakum verjuspæli á øðrum veinginum. Dysturin var ikki av teimum best spældu, men hann gjørdist tó ongantíð ljótur, og tað var fyrst og fremst góðu dómarunum, Hjalmari Petersen og Kristiani Johansen, fyri at takka.
