Fyrra hálvfinalan í Champoions League kappingini millum Manchester United og Arsenal á Old Trafford í Manchester endaði við einum 1-0 sigri til heimaliðið.
Manchester United legði hart út, men tað eydnaðist bert at fáa eitt mál í dystinum. Ìrin, John O´Shea gjørdist matchvinnari, tá hann bankaði eitt hart skot í netið, sum Almunia í Arsenal-málinum hálvbjargaði á vegnum.
Restina av dystinum hevði heimaliðið væl fleiri málmøguleikar, enn Arsenal, sum vóru óvanliga verjukendir í kvøld. Almunia spældi ein branddyst í málinum hjá Arsenal, og tók hann fleiri góð skot. Tað nærmasta United kom at økja um leiðsluna, var í øðrum hálvleiki, tá eitt langskot hjá Christiano Ronaldo rakti yvirleggjaran.
Tað ljóðar, at Robin van Persie verður tøkur til seinnu hálvfinaluna, sum verður á Emirates Leikvøllinum í London um seks dagar. Tá skal Arsenal fram á vøllin, og er eingin ivi um, at talan tá verður um ein heilt annan dyst.
