Í vár varð Pætur Clementsen settur í starv sum tekniskur stjóri í FSF. Pætur tók við starvinum 1. august, men kemur fram til ársenda at arbeiða hálva tíð, meðan hann skrivar høvuðsritgerð innan ítróttarsálarfrøði við lærda háskúlan í Keypmannahavn. Hetta skrivar heimasíðan hjá fótbóltssambandinum, fsf.fo.
Tíðin hjá Pæturi fram til nýggjárs verður í mestan mun nýtt til at gera "status" fyri føroyskan fótbólt. Tað verður millum annað gjørt við, at tekniski stjórin fer at vitja øll feløgini, har hann fer at hitta formenn, høvuðsungdomsvenjarar og aðrar viðkomandi persónar í feløgunum.
Í skiftistíðini verður Petur Simonsen, ið hevur røkt starvið sum tekniskur stjóri seinastu fimm árini, men sum nú fer frá vegna aldur, eisini í starvi, og kemur hann í tíðarskeiðinum at taka sær av somu uppgávum sum áður, skrivar heimasíðan hjá fótbóltssambandinum at enda.
