Í nógva vindinum í morgun reiv tekjan av Kristnastovu í Gongini í Havn. Nakrar takplátur fuku millum húsini í gomlu Havnini
Einar seks aluminiumstakplátur á sunnara kvistinum á Kristnastovu í Gongini í Havn rivu í nógva vindinum í morgun.
Í Gongini er tiltikið veðurgott, men tá hann er so lágur í ættini, sum hann hevur verið síðstu dagarnar, liggur vindur beint niðan gjøgnum Gongina, og har fekk vindurin so fatur undir takpláturin á kvistinum á Kristnastovu, sum vendir beint upp í ættina.
Pláturnar fuku í vindinum millum húsini á Doktaragrund og niðan gjøgnum Gongina - eftir øllum at døma uttan at gera skaða.
Sløkkiliðið varð boðsent, og við stóra stigabilinum fingu menn frá Sløkkiliðnum bjargað tekjuni soleiðis, at skaðin ikki gjørdist størri.
Í Kristnastovu húsast Heilsusystrarnar og Rættarhjálp Føroya.
Hyggið eftir fleiri myndum á MYNDATEMA (Trýst her!)
