Meginpartin av degnum í dag hevur øll koyring hjá Bygdaleiðum ligið lamin. Einasti bussur, sum koyrdi tíðliga í morgun, var leið 600 í Sandoynni, sum koyrdi til fyrsta túr hjá Teistanum úr Skopun klokkan 06.45 í morgun.
Men, tá fólk komu úr Skopun og yvir á Gomlurætt á fyrsta túri, var eingin bussur har, tí eins og øll koyring hjá Bygdaleiðum yvirhøvur í dag, var eisini hesin bussurin avlýstur.
Soleiðis noyddust ferðafólk, sum skuldu um Skopunarfjørð í dag og ikki høvdu bil sjálvi, at finna sær flutning millum Gomlurætt og Havnina – og millum Skopun og hinar bygdirnar í Sandoynni.
Teistin hevur annars siglt í allan dag, undantikið túrin úr Skopun klokkan 22.30 og túrin av Gomlurætt klokkan 23.05 í kvøld.
Á heimasíðuni hjá Strandfaraskipum Landsins stendur at lesa, at Teistin siglir ikki hesar báðar túrarnar í kvøld vegna viðlíkahaldsarbeiði.
Aðrar sjóvegis farleiðir hjá Standfaraskipum Landsins hava eisini verið órógvaðar av veðri í dag. Lýst hevur eitt nú verið við, at Ritan, sum røkir sigling millum Hvannasund, Svínoy, Kirkju og Hattarvík, siglir ikki meira í dag, og Sildberin siglir heldur ikki fyribils.
Á heimasíðuni ssl.fo verður víst á, at veðurvánirnar fyri morgindagin og mikudagin eru vánaligar, og tí kann roknast við, at onkrar avlýsingar verða.
Lýst verður eisini við, at í morgin – týsdagin – fer Smyril av Krambatanga klokkan 07, og hann fer av Havnini og suður aftur á Krambatanga klokkan 16 seinnapartin í morgin.
##med2##
