Munurin millum bestu og næstbestu fótbóltsdeildina tykist at vaksa. Tað er aftur undirstrikað í hesi vikuni.
Tey trý fremstu í næstbestu deildini hava øll spælt í gjárkvøldið ella í kvøld. Felags fyri tey øll var, at tey hittu næstbesta liðið hjá felag, sum eisini er umboðað í bestu deildini, og felags er eisini, at einki av teimum trimum bestu í næstbestu deildini megnaði at vinna á eykaliðunum hjá Vodafonefeløgum.
Í Klaksvík varð KÍ í ein tíma úrlatið av væl upplagda eykaliðnum hjá Víkingi, sum tó var styrkt við fýra Vodafone spælarum - Bárður Hansen, Finnur Justinussen, Kaj Leo í Bartalsstovu og Hjartvard Hansen.
Úrslitið var 4-2 til Víking, sum í 2. hálvleiki tóktist at slaka eitt sindur av og skifti út, áðrenn KÍ svaraði aftur tvær ferðir.
Gongdin var staðfesting av, at tað er langt hjá klaksvíkingum upp aftur á toppin, har teir inntil fyri ikki so ógvuliga nógvum árum síðani vóru fast inventar.
Í Streymnesi var eykaliðið hjá EB/Streymi í hálvleikinum á odda 3-1 ímóti teimum bestu hjá 07 Vestur, sum í 2. hálvleiki svaraði aftur, so úrslitið gjørdist 3-3.
Í annaðkvøld skal EB/Streymur spæla steypafinalu í Klaksvík, og tí sigur tað seg sjálvt, at ongir av Vodafonespælarunum vóru við í kvøld.
Í gjárkvøldið tapti TB 2-1 í Gundadali ímóti teimum næstbestu hjá HB.
Úrslit
4. august
HB-TB 2-1 (1-1)
0-1: Rógvi Joensen 14.
1-1: Bárður Mortansson br 38.
2-1: Bárður Mortansson 48.
5. august
EB/Streymur-07 Vestur 3-3 (3-1)
1-0: Arnar Dam 18.
2-0: Jens Michael Jensen 24.
2-1: Johan Ejvind Mouritsen 36.
3-1: Teitur Joensen 45.
3-2: Johan Ejvind Mouritsen 55.
3-3: Tór-Ingar Akselsen 81.
KÍ-Víkingur 2-4 (0-3)
0-1: Dánjal Pauli Lervig 28.
0-2: Kaj Leo í Bartalsstovu 29.
0-3: Finnur Justinussen 32.
0-4: Finnur Justinussen 57.
1-4: Steffan Kalsø 58.
2-4: Steffan Kalsø 73.
7. august
AB-FC Hoyvík
8. august
HB-NSÍ
TB-B68
Støðan
KÍ 31
07 Vestur 30
TB 29
Víkingur 25
HB 25
EB/Streymur 23
AB 19
NSÍ 18
FC Hoyvík 14
B68 2
AB, NSÍ, FC Hoyvík og B68 hava spælt 15 dystir, og hini liðini hava spælt 16 dystir.
