Teir hava úr at gera á lemmmavirkinum í Vági

Árið í ár hevur roynst væl á virkinum Rock Trawl Doors í Vági. Fyrraárið royndist einki ser­ligt, men í fjør var góð gongd í aftur, og í ár hevur byrð­ur­in verið góður.
Stjórin á virkinum, Hans Joen­sen, róptur Hans í Líðini, letur væl at gongdini í ár.
- Jú, vit hava nógv at gera, og vit eru 15 mans til arbeiðis. Í løtuni er eftirspurningurin eftir okkara trollemmum so stórur, at neyðugt hevur verið at arbeitt í skiftivaktum.
Hann sigur, at felagið gjøg­num árini hevur selt nógvar lemm­ar í Íslandi, Grøn­landi og Kanada, men eisini til meira fjarskotin lond sum eitt nú Ný Sæ­lands.
- Men, í løtuni hava vit størs­ta eftirspurningin í No­regi. Norðmenn hava bygt nógv nýggj skip og av seks skip­um, sum nýliga eru farin til fiskiskap, hevur Rock Trawl Doors selt lemmar til fýra av hesum.
Hans í Líðini sigur, at felagið javnan lut­teku­r uttan­lands á fiski­vinnu­stevn­um, og tað er ikki minst á slíkum stevnum, at felagið fær fyrispurningar og fær møguleikan at senda tilboð upp á føroysku lemmarnar.
- Jú, hetta árið hevur verið rættiliga gott eftir okkara mátistokki, og hetta er ein spennandi tíð hjá okk­um, har vit eisini arbeiða við at menna nýggj snið av lemm­um.
Rock Trawl Doors hevur eisi­ni ein verkfrøðing til hjálpar, sum er við í menn­ing­ini av nýggjum sniðum av lemmum.

Føroysk undirtøka
Hans í Líðini sigur, at flestu før­oysk skip, sum fiska við lemm­um, hava lemmar úr Vági. Tað eru tó nøkur einstøk smæ­rri skip, sum keypa lemm­ar úr útlandinum.
Hann vísir á, at felagið í Vági leggur dent á dygdina, og tað eru skip, sum hava brúkt somu lemmar hjá Rock Trawl Doors í fleiri ár.
- Okkurt av teimum stóru før­oysku skipunum man hava fiskað fyri tað mesta av einari miljard krónum við sama setti av lemmum frá okk­um.
Stjórin sigur, at tað er ser­liga í snið og dygd, at felagið í Vági bjóðar seg fram á mark­nað­inum og vinnur í kapp­ing við aðrar - og eisini fjar­skotnar - útbjóðarar.
- Sjálvandi er tað ikki lætt at kappast við lágu tíma­løn­ina í eitt nú Kina, men tað er í dygdini og drúgvu royndunum við hesi framleiðslu, at vit hava okk­ara styrki, sigur Hans í Líð­ini.