Tað hendir eitt sindur av hvørjum í Team Klaksvík í hesum døgum. Nýggjur vinstri bakkur er komin til úr Moldova, Eil Gærdum skiftir til felagið frá StÍf, Niclas Niclasen spælir aftur og Svein Rógvi Nielsen Ljósstein skal standa á odda fyri kropsligu venjingini.
Team Klaksvík endaði aftast í farna kappingarárið við ongum stigi. Nú ætlar Team Klaksvík at bjóða hinum av.
- Vit fara eftir toppinum. Vit ætla okkum í finaluna í bæði landskappingini og steypakappingini, sigur Heri Johnsson, formaður í Team Klaksvík.
Team Klaksvík hevur gjørt avtalu við Igor Petrikeev úr Moldova. Hann er 29 ára gamal og spælir á vinstra bakki. Umframt hann, so hevur felagið fingið tilgongd av Eil Gærdum frá StÍF, umframt at Niclas Niclasen eisini verður at síggja í hópinum aftur.
Zarko Pejovic heldur ikki fram sum venjari. Felagið hevur ikki sett nýggjan høvðusvenjara, men Svein Rógvi Ljósstein Nielsen kemur at taka sær av kropsligu venjingini. Tað verður eisini hann sum fyribils, til nýggjur venjari er settur, tekur sær av venjingini hjá besta liðnum hjá Team Klaksvík.
