Bragdið framdu teir í høllini á Hálsi í Havn, har teir vunnu 23-21 eftir at hava verið á odda 13-10 í hálvleikinum. Hetta er tó ikki fyrstu ferð, at Team Klaksvík vinnur ímóti Neistanum á útivølli. Í landskappingini vunnu teir nevniliga fyrr í hesum kappingarárinum 30-29, og staðfestu teir altso hesaferð í steypakappingini, at teir hava gott tak á teimum bláu úr Havn.
Team Klaksvík legði betur fyri og eftir góðum 10 minuttum vóru teir á odda 8-3. Tá ið tveir minuttir restaðu í, hevði Neistin fingið minkað um klaksvíksleiðsluna niður í 20-21 og seinni 21-22, men tað var altso Team Klaksvík, sum fekk síðsta málið í dystinum, og harvið fingu eina frálíka byrjan í steypakappingini við einum 23-21-sigri.
Sjúrður Thomassen gjørdi fimm mál fyri heimaliðið, meðan Sámal á Tjaldrafløtti fekk átta mál fyri Team Klaksvík.
