Kappingarárið lýður fram ímóti endanum, og tað kann ikki sigast annað, enn at tað á fleiri frontum er intensitetur í næstbestu deildini.
Eitt er, at tað meiri enn so er komið fyri, at úrslitini hava lagað seg øðrvísi, enn tað kundi roknast við, og eitt annað er tað, at nú snýr seg spenningurin eisini um, um feløgini í høvuðsstaðnum megna at manna lið, tá ið tey skulu til Vágs at spæla.
Fyri nøkrum vikum síðani var tað HB, sum gav avboð, og í gjár var tað FC Hoyvík. Í botninum megnaði illa sperda FC Hoyvík ikki at manna lið, og harvið varð tað greitt, at FC Suðuroy næsta kappingarár verður partur av bestu deildini. At sigurin varð vunnin á skrivaraborðinum 3-0 var ikki júst soleiðis, sum tey í Vági og Sumba høvdu ætlað, at uppflytingin skuldi markerast.
Seinastu stóru vikuna hevur TB sitið á hinum uppflytingarplássinum, og harvið hava tvey feløg úr Suðuroy havt kóst ímóti bestu deildini.
Tað er framvegis møguleiki fyri, at TB skal flyta upp, men eftir kiksaran ímóti teimum næstbestu hjá HB sær tað ikki so gott út.
HB er í stríði fyri at varðveita plássið í deildini, og tað gjørdist júst so torført, sum tvørafólk høvdu stúrt fyri, at tað kanska fór at verða. Tað vísti seg, at særda bjørnin var ikki soleiðis at spæla við.
Tað var avgerandi, at TB málverjin longu í 13. minutti varð vístur av vøllinum. Verjuspælarin Aron Sørensen fór í málverjubúnan. Hóast hann stóð seg væl, og hóast Tórur Mortensen legði TB á odda, tá ið eitt lítið korter var farið av 2. hálvleiki, so gjørdist útvísingin dýr hjá TB
HB stríddist sum úlvur á skóg, og tað eydnaðist bæði at javna og skjóta sigursmálið. Jógvan Andrias Nolsøe var skiftur inn á HB liðið í 57. minutti, og hann fekk avgerandi leiklut. Fyrst var hann uppi í, tá ið TB miðverjin, Dmitrije Jankovic var so óheppin at gera sjálvmál, tá ið tað bara restaði ein lítil løta, tá ið Jógvan Andrias Nolsøe skoraði sigursmálið.
At HB vann á TB, gav AB ein nýggjan møguleika at sleppa upp í part at kappast um uppflytingina, og argjamenn tóku so rudduliga av. Móti EB/Streymi eydnaðist AB á heimavølli at vinna 6-0, og harvið er AB aftur á uppflytingarplássi. EB/Streymur helt tørn, inntil fyrri parturin av 1. hálvleiki var av, men so skrædnaði.
AB og TB eru jøvn í stigum, men AB er á uppflytingarplássi, tí málmunurin hjá teimum á Argjum er betri, enn hann er hjá TB. Málmunurin hjá AB er +47, og hjá TB er hann +41. Í tveimum teimum síðstu umførunum skal AB spæla ímóti Víkingi (ú) og FC Hoyvík (h), og TB skal spæla ímóti NSÍ (h) og EB/Streymur (ú).
NSÍ helt við 3-1 heimasigri á 07 Vestur tørn um fjórða plássið í deildini. Øll málini vórðu skorað í 2. hálvleiki. Í oyggjauppgerðini á Skála eydnaðist tað heimaliðnum at vinna 1-0 á Víkingi. Harvið er tað mest sum avgjørt, at Skála vinnur fimta plássið og harvið ein eyka heimadyst. Skála toppskjúttin Brian Jacobsen skoraði sigursmálið miðskeiðis í 2. hálvleiki.
