Tap – men svar upp á fleiri spurningar

Tað var greitt undan dyst­inum, at Lars Olsen fór at royna nøkur nýggj ting. Páll Klett­skarð og Klæmint Olsen byrjaðu inni í álopinum, meðan Pól Jóhannus Justinussen varð fluttur í mið­verj­una. Á vinstra bakki fekk Erling Jacobsen úr Víkingi møguleikan, meðan Heini Vatnsdal og Hallur Hansson byrjaðu á miðjuni.

3-0 til Malta
Føroyska liðið tapur fyrra hálvleik 3-0. Tað er ikki mun­urin á liðnum, men Malta tekur av sínum møguleikum. Teir kunnu enntá koma upp á 4-0 um væl vil. Hinvegin, so kundu vit fingið tvey mál, eftir góð álop.
Tvey av málunum er feilir frá okkara síðu. Tað er ilt at siga, um Gunnar Nielsen skal bjarga málinum til 1-0. Talan er um skot úr fleiri enn 30 metrum. Í so máta skal hann helst fáa hondina á, men sjón­varpsupptøkurnar geva onga ábending um bólturin eitt nú leitar undan Gunnari, ella hvussu útsýnið er hjá mál­verjanum er.
Málið til 2-0 er týpiskt fyri Føroyar. Vit fara í álop og missa bóltin. Síðani gongur so skjótt, at vit ikki klára at fylgja við. Tað endar við at Michael Mifsud ov lættliga dregur framvið tveimum før­oyskum verjuspælarum, sum ikki klára at verja fyri, hóast Erling Jacobsen tykist verða í góðari støðu.
Málið til 3-0 er vánaligt før­oyskt verjuspælt. Fyrst miss­ur Rógvi Baldvinsson ein óneyðugan bólt upp á mið­vøllinum. Hetta er ein aftur­vendandi trupulleiki, har álopssinnaði miðverjin kemur fram við. Tað er ein trupulleiki, tá tað mis­eydn­ast, men tað er eisini ein loysn, sum kann skapa nógv. Mill­um annað skorar hann eis­ini í dystinum, har hann hev­ur dirvið at koma fram á vøllin og bjóða av.
Tað endar við horna­sparkið, sum verður tikið stutt. Síðani slær Jónas Tór Næs frá og Malta spælir bóltin innum og so frá bak­linj­uni í høgru inn fyri til ein púra leysan Jonathan Caruana, sum lættliga kann skora. Millum annað Heini Vatns­dal og aðrir standa bara og hyggja. Ikki nóg gott.

Páll vil hava plássið
Í fyrra hálvleiki skuldi før­oyska liðið umstilla seg til 4-4-2, í mun til 4-51-1/4-2-3-1 upp­stillingina, sum bara hev­ur ein áleypara. Bæði Páll Klettskarð og Klæmint Olsen byrjaði inni. Tað gav nakrar spentar støður frammanfyri málið hjá Malta, tí talan er um tveir arbeiðshestar, sum renna eftir øllum.
Í fyrra hálvleiki kom Páll væl frá síni uppgávu og kundi fingið upp til tvey mál. Hann riggar somuleiðis væl í uppspælinum og prógvar í løtuni, at hann er eitt gott boð upp á ein føroyskan lands­liðsáleypara. Helst við Christian Lamhauge Holst ella Jóan Símuni Edmunds­son sum makkara.
Páll og Klæmint líkjast til eitt vist ov nógv til at byrja inni, men Klæmint vísti seg eisini frá síni góðu síðu, tá hann átti frálíkt upplegg til júst Páll, tá hann sleit seg leys­an í høgru og legði bóltin innfyri. Tað er óhugsandi, at teir koma at byrja inni í senn í næst­mast framtíð í einum kappingarførum dysti, men heldur verður talan um løtur móti endanum av dystum, tá føroyska liðið skal hava mál.
Páll varð saman við Halli Hansson besti maður á vøll­inum.

So trúgvi upp á tað!
Í seinna hálvleiki tekur tað før­oyska liðnum ein hálvan tíma at finna útav, at teir faktist kunnu hótta Malta. Sonni Ragnar Nattestad kemur í miðverjuna fyri Pól Jóhannus Justinussen, sum verður skumpaður fram á vinstra vong, har Christian R. Mouritsen verður útskiftur. Tað er ógreitt hví Christian fór út, men hann var mest skap­andi spælarin í fyrra hálv­leiki. Skaddur kanska?
Pól Jóhannus prógvaði aftur, at hann skal spæla á vinstra vongi. Hann terrori­serar høgra bakkin hjá mót­støðu­liðnum og skapar órógv. Hann er ikki týpan, sum skal »spæla« fótbólt, men tá styrkin hjá honum verð­ur brúkt rætt, so er hann ein fongur fyri landsliðið. eitt nú vinnur hann liðnum fleiri innkøst og hornaspørk enn nakar annar spælari.
Tað er ikki fyrr enn Hallur Hansson minkar um munin tíggju minuttir fyri tíð, at spælararnir byrja at trúgva upp á at tað ber til. Brádliga leypa teir á við eini ætlan um at skora. Føroyar tapti ikki dystin, tíðin gekk bara und­an. Tí hevði dysturin vart í 10 min­uttir afturat, so hevði Malta ikki vunnið!

Lars hevur lært
Landsliðsvenjari, Lars Olsen, hevur nú lært at Pól Jóhannus er ein vinstri vong­ur. At Sonni Ragnar er ein fram­tíðar spælari. At Páll Klett­skarð er um at verða klárur til at byrja inni fyri lands­liðið (málini mangla). At ein miðvøllur við tveimum spæl­arum er eitt sats, sum kann geva bakslag. At tað má upp­bakningur á Rógva Baldvinsson um hann fer fram við bóltinum. At Hallur Hansson mennist í hvørjum. At Christian R. Mouritsen og Heini Vatnsdal hava nógv at geva landsliðnum, men at Lars má geva teimum tað sein­asta.
Hvat skulu vit við einum landsdysti móti Malta í november. Fáa svar upp á spurn­ingar, sum vit ikki kunnu fáa svar upp á í undan­kappingardystum. Tað fingu vit!